Snig

Ponediljak. Za ča je drugo ponediljak nego za spat do podne? Poučen ton životnon mudrošću, spa san do podne. Bilo je prekrasno, skoro ko nova sezona Black mirrora. Kad buden tako doma, i kad se zbudin iman vajk naviku još malo (jeno dve tri ure) ležat na postelji i vikat: "Mama, donesi mi krofnu i času vode pls". Onda mama reče nek si dojden zet sam i ja se brižan mrtvac stanen i dojden u kuhinju i onda ne bude krofne a mama samo reče:"loool". Bilo kako bude, tega ponediljka je mama došla u sobu sva ushićena. Već san misli da smo dobili nasljedstvo od nepostojećih rođaka iz Tajlanda i da ću zavajk bit bogat i da nič neću rabit delat. Ali nažalost to ni bi slučaj, mamu raduju male stvar. "Pogledaj kroz ukno pere" , rekla je euforčino. Zajno san zna da je snih jer zač bi ikad iki gleda kroz ukno ako ni snig. Svi dobro znamo da se kroz prozor gleda snjega, ili s nje, ako si muški. Iskreno, obradovala me činjenica da je snih, bi san doma, nisan ima drugih dela a i odavno ni pada. Ni da toliko obožavan snih ali neke druge stvari me raduju kad padaju te bijele tvorevine. Prvo i najbolje od svega je poć na mjesni trg u Gračišće i gledat kako ljudi padaju. Tamo se zna skupit oko dvadesetak gledatelja, zemu si bire i grickalice i čekaju da počnu pasivat ljudi. Većinom to budu stariji ljudi ki nemoru baš hodit, zato san vajk protiv tega kolektivnog gledanja kako ljudi padaju. Okej kega ja lažen smišno je sejno. Ali moran naglasit da vajk sa strane budu zadužena dva čovika koji pokle pomoru dignut palu osobu. Baš smo pravi. Da nas ni nas nanke nebi rabilo zmislit eto. Još bude kul jer se vajk neki najde pa dela snješketa. I tako stave metlu kao ruke ili lonac na glavu. To je savršena prilika za mene jer zač bin kupiva metlu ako je moren zet snješketu, ne bude ne on čisti. Pa gospodo ja san po liti dela pol dana da bin zaradi za takovu metlu. Život me je navadi da sve moran iskoristit, preoblikovat da meni paše. A i lonac dobro dojde, zač kupivat delimano posuđe od nehrđajućeg čelika kad moreš zet snješketu. A inače tako vajk mi je zanimljivo anke kako ljudi nisu nikad zadovoljni. Kad je snig je grdo se nemore delat, neprohodno, bljuzgavo bude bla bla. Kad je lito uuu je teplo, ni zraka, sunčanica, potni su svi, opet ne paše. Kad je proljeće alergije, samo da pasaju alergije jaoo. Dojde jesen, ah kakovo je to vrime, neznan kako se obuć hojhojhojh. Nikad sretni. Nikad. Hote živit na mars ča da van rečen. Eto.